Skip to content

Kingsbury: Peunasehat Nyang Keunong Khianat (I)

August 28, 2012

“‘oh lheueh nyan ureueng nyan (Malik, Zaini, dan Nur Djuli) geutanyong pakriban peundapat lon teuntang peukara nyan, dan lon peugah bak ureueng nyan lon han jeuet bi peundapat sapeue le.” – Damien Kingsbury

Damien Kingsbury nakeuh sidroe ureueng Australia nyang jeuet keu peunasehat GAM yoh na peurundingan Helsinki nibak thon 2005. Kingsbury, meunan chit William Nessen, sampoe ‘an uroe nyoe mantong han dibi izin untok tamong u nanggroe Indonesia, salah saboh sabab jih nakeuh keuteurlibatan ureueng nyan dalam peurjuangan GAM. 

 Nan Damien Kingsbury chit hana that taturi le geutanyoe ureueng Acheh. Beuthat pih meunan, droe geuh sebetoi jih that teurlibat seucara langsong dalam peurjanjian Helsinki. Dudoe yoh masa-masa akhe peurundingan, droe geuh hana le seunang deungon asoe nibak MoU Helsinki lam peukara TNI, teuma jinoe droe geuh ka hana meukeunong le chit ngon parte Malik Mahmud.  

 Tulesan nyoe ulon tuleh sabab lon kalon peuranan Damien Kingsbury (ureueng internasional) nakeuh that rayek dalam peurjuangan GAM yoh masa di Helsinki. Sabab nyan keuh, seujarah nyan beujeuet keu peulajaran keu geutanyoe teuntang arti nibak beunantu ureueng ‘international’ dan pakriban cara tacok manfaat dari beunantu ureueng nyan.

 Tulesan nyoe Insya Allah akan lon peugot dalam meupadum boh artikel nyang lam tiep-tiep artikel akan lon bahaih saboh-saboh peukara nyang lon rasa peunteng dan patot geuteupeue le ureueng rame. Untok artikel keu phon, lon keumeung tuleh seujarah Damien Kingsbury jeuet keu peunasehat GAM.    

…………………………………..

Peunasehat GAM

 Meunurot Kingsbury, droe geuh phon that geumeuturi ngon ureueng-ureueng GAM dari buet peuneulitian droe geuh teuntang teuntra Indonesia. Kingsbury chit that geuturi le masyarakat donya sibagoe salah sidroe ureueng nyang anti keu politek teuntra Indonesia. Meunurot droe geuh keudroe, sampoe ‘an jinoe pih gop nyan mantong yakin bahwa TNI nyan nakeuh salah saboh institusi nyang korup dan brutal nyang hana patot roh dalam donya politek nyang takheun manosiawi dan demokratik. Meunan keuh geurasa teuntang hubongan droe geuh deungon GAM yoh masa phon geumeuturi nyan, musoh nibak musoh droe geuh nakeuh rakan geuh, atawa lam basa Inggreh takheun, “the enemy of my enemy is my friend.” 

 Hubongan Kingsbury deungon GAM yoh masa nyan, maken si-uroe nakeuh maken toe laju, seuhingga nibak thon 2001 gop nyan geuteumeueng keuseumpatan untok meurumpok ngon pasukan GAM pimpenan Teungku Jamaica lam uteuen Acheh. Teuma ‘oh lheueh geujak kunjong pasukan Teungku Jamaica nyan, ureueng GAM laju geubi keupeurcayaan nyang maken rayek keu si Kingsbury nyoe. Meunan keuh dudoe, nibak akhe buleuen siploh thon 2004, peumimpen GAM di Swedia geu-undang Kingsbury untok meurumpok ngon ureueng nyan di Stockholm, Swedia. 

 Na peukara-peukara nyang that meunarek untok tateupeue yoh watee Kingsbury meurumpok ngon pimpenan GAM yoh masa nyan. Kingsbury geupeugah, bahwa watee geumeurumpok deungon pimpenan GAM, ureueng nyan hana that le geumeuceukot teuntang ideologi Acheh Mardehka dan pakriban cara ureueng nyan keuneuk peujak buet peumardehka Acheh. Meulaenkan, leubeh le geumeuceukot teuntang buet peumakmu/peusijahtra rakyat Acheh dan buet peuseulamat hase bumoe Acheh deungon cara peumeukleh droe (Acheh) dari Indonesia. Teuma meunurot Kingsbury, meunyo chit keuneuk peuseulamat hase bumoe mantong, nyan hana payah tamuprang (mardehka) pih jeuet chit. Yoh masa nyan keuh Kinsbury geuthee bahwa na keumungkinan GAM akan geupeugot keuseupakatan ngon Indonesia.

 Kingsbury geutuleh:

“Assuming the goal was to improve the lives of the people of Aceh by altering their relationship with Jakarta, and not separatism for its own sake, it became possible to consider alternative approaches to ending the conflict.”

 Meumakna:

“Meunyo takheun tujuan jih nakeuh untok tapeumakmu udep rakyat Acheh deungon cara ta-ubah hubongan deungon Jakarta, dan kon bit-bit untok peumeukleh (peumardehka) Acheh keu droe, maka ka teuntee jeuet tamita cara laen untok tapeupiyoh konflik.”

 Mantong lam rapat nyoe chit, peumimpen GAM teuma geupeutroh haba bak Kingsbury bahwa ureueng nyan ka na meuhubong ngon pihak Indonesia teuntang keumungkinan untok meuduek runding lom, dan sira geutanyong, peue keuh Kingsbury na jeuet geubantu beurangkapeue ntreuk meunyo na jadeh geupeugot peurundingan nyan? Teuma bak watee nyan keuh laju ka na pakat dari Kingsbury untok jak bantu GAM dan seucara hana resmi ka jeuet droe geuh keu peunasehat GAM.

Dudoe, undangan reusmi untok peungon peumimpen GAM sibagoe peunasehat dalam rapat Helsinki pih trok bak jaroe droe geuh bak akhe buleuen sa thon 2005. Beuthat pih meunan, undangan reusmi dari CMI (Crisis Management Initiative, organisasi nyang peugot acara duek pakat Helsinki) keu GAM dan pihak Indonesia untok jak meurunding di Helsinki nyan ka teupeuteubiet dari tanggai 24 buleuen 12 thon 2004 kon (dua uroe sigohlom teuka bala geumpa dan tsunami u Acheh).

Meunan keuh calitra Prof. Damien Kingsbury dari Australia jeuet keu Peunasehat Peurwakilan GAM dalam peurundingan Helsinki nibak thon 2005.

…………………………………..

Dari fakta seujarah nyoe, na keusimpulan-keusimpulan nyang jeuet tatuleh nakeuh: 

  • nibak akhe buleuen siploh 2004 (dua buleuen sigohlom teuka bala geumpa dan tsunami u Acheh), politek luwa nanggroe GAM pimpenan Malik Mahmud chit ka kon le untok peudong Nanggroe Acheh meulaenkan untok peuseulamat ubena hareuta deungon daleh untok “peumakmu rakyat”. 
  • peumimpen GAM dimuyup koasa Malik Mahmud hana keumampuan untok peubuet buet diplomasi luwa nanggroe. Kon lagee almarhum Teungku Hasan dan ureueng-ureueng toe droeneuh nyan nyang ka awai geupeucat le Malik, nyang mampu geupeuyakin ureueng luwa bahwa peurjuangan bansa Acheh nakeuh buet nyang mutlak sibagoe buet peudong deelat bansa nyang ka leubeh awai mardehka nibak dum bansa laen lam donya, nyang ka dipeuprang le Beulanda, dan dudoe ka dijajah le Indonesia. That sayang, peumimpen GAM dimuyup Malik Mahmud hanya mampu geupeuyakin peunasehat droe geuh bahwa peurjuangan bansa Acheh nakeuh peurjuangan jak peuseulamat hareuta, chit peureuseh lagee nyang deuh takalon jinoe geupeubuet buet di Nanggroe teuh nyoe. 
  • peunasehat GAM ka geuteurimong haba nyang salah teuntang ideologi peurjungan bansa Acheh dan ka teuntee geujak lam peurundingan deungon peumikiran nyang salah chit. Ka lagee ureueng teungeuet geubi bu, ureueng deuek geubi bantai, meunan keuh buet sidroe-droe ureueng meunyo hana meuphom keuadaan nyang seubeutoi jih.
  • peurundingan Helsinki geupeuphon kon keuh sabab na troh bala geumpa dan tsunami u Acheh. Jeu-oh uroe sigohlom nyan, rancangan untok peugot peurundingan nyan ka lheueh geupeujak. TSUNAMI ka geupeungui sibagoe alat untok peulikot tanggong jaweueb droe geuh (pimpenan GAM) ateuh bansa Acheh nyang ka geumeujuang meuploh-ploh thon untok geupeudong deelat Nanggroe endatu geuh.

Meunan keuh saboh lapeh seujarah bansa geutanyoe Acheh. Tulesan nyoe Insya Allah akan meusambong lom ukeue teuntang keuteurlibatan Kingsbury dalam peurundingan Helsinki. Untok jinoe ka jeuet tateupeue dilee pakriban calitra Kingsbury nyan jeuet keu peunasehat GAM. Teuma, lon lakee komentar dari ureueng droe neuh mandum nyang na neubaca tulesan nyoe, beujeuet keu bahan diskusi geutanyoe.

Sumber:Peace in Aceh, A Personal Account of the Helsinki Peace Process, oleh: Damien Kingsbury.

Geunaseh:Keu rakan nyang na di Singapore nyang ka neutem bloe buku-buku teuntang Acheh keu lon. Thank you very much. 

Darussalam, 27 Agustus 2012

Mundzir Bin Muntasir

Advertisements

Kisah Malik Mahmud dan Doto Zaini Didrop di Swedia

August 28, 2012

Saleuem meutuah,

Alhamdulillah karap geunap sibuleuen geutanyoe ummat Islam tameupoasa. Insya Allah uroe raya akan trok sigra. Meunan keuh ulon tuan, Mundzir bin Muntasir, meulakee meu’ah ube na salah dan deesya keu mandum syeedara.

Uroe nyoe, Insya Allah, ulon tuwan keuneuk bahaih peukara buet peungeuet-seumeungeuet nyang ka geupeulaku le ‘peumimpen’ GAM dibawah peurintah Malik Mahmud nyang ka jeuet keu pake di ureueng geutanyoe sare keudroe-droe. Peukara nyang ulon tuan meukeusud nakeuh peukara keuadaan 3 droe ‘peumimpen’ GAM (Alm. Teungku Hasan, Malik Mahmud, dan Zaini Abdullah) sigohlom Malik Mahmud dan rakan-rakan geujak meurundeng keudeh u Helsinki.

Pakon peukara nyoe peunteng that-that untok tateupeue? Sabab deungon tateupeue keuadaan ureueng nyoe yoh masa nyan keuh baro geutanyoe jeuet meuphom mandum keujadian di Helsinki sampoe diteubiet Nota Saban Meuphom (Memorandum of Understanding, MoU) Helsinki.

Lagee nyang ka tateupeue, GAM dan Indonesia ka geuduek pakat di Helsinki bak thon 2005 deungon President Martii Ahtisaari (mantan president nanggroe Finlandia, keutuha nibak Crisis Management Initiave atawa CMI) geuduek sibagoe ureueng teungoh. Duek pakat nyan teupeujak dalam 5 boh ronde nyang ka geupeuphon bak uroe buleuen 27 Januari 2005 dan geupeulheueh bak uroe buleuen 15 Agustus 2005 deungon geuteken MoU Helsinki dan Acheh pih dame.

Beuthat pih duek pakat nyan ka geupeuphon bak awai thon 2005 lheueh teuka Tsunami dan rame ureueng geutanyoe nyang geupike bahwa duek pakat nyan geupeugot sabab Acheh teungoh lam bala akibat Geumpa dan Tsunami, tapi keunyataan jih nakeuh duek pakat nyan ka geureuncana jeu-oh uroe sigohlom bala nyan trok bak nanggroe geutanyoe nyoe.

Nakeuh sidroe ureueng Finlandia, Juha Christensen nan ureueng nyan, peunasihat nibak President Martii dan lheueh nyan peunasihat nibak Pieter Feith (keutuha Acheh Monitoring Mission – AMM), geupeugah bak the Jakarta Post:

“On Dec. 24, 2004, two days before the tsunami, Juha sent a confirmatory letter and an invitation to the two parties to hold the first meeting in Helsinki.”

“Bak uroe buleuen 24 Desember 2004, dua uroe sigohlom tsunami, Juha ka geukirem surat konfirmasi dan undangan keu mandua blah pihak (GAM dan Indonesia) untok peugot rapat keuphon di Helsinki.”

“The process of preparing a dialogue started long before the tsunami hit Aceh. In the end, a lot of people were convinced peace in Aceh was achieved because of the tsunami.”

“Buet untok peukeumah acara duek pakat nyan ka teupeuphon jeu-oh uroe sigohlom tsunami trok u Acheh. Tapi bak keuneulheueh, rame ureueng nyang yakin bahwa dame di Acheh nyan na sabab tsunami.”

Ureueng laen lom, Damien Kingsbury dari Australia, ka geupeunyata bahwa ka troh haba peurmintaan bak droe geuh dari ‘peumimpen’ GAM untok jak bantu ureueng nyan dalam duek pakat antara GAM dan Indonesia. Haba nyan ka troh bak droe geuh bak buleuen Oktober 2004, dua buleuen sigohlom Tsunami teuka.

Meunan keuh, ka deuh takalon bahwa buet awai untok peugot duek sapat nyan chit kalheueh geupeujak jeu-oh uroe sigohlom bala geumpa dan geulumbang raya trok u Acheh. Oleh kareuna nyan, geutanyoe payah tapinah mandum peukara bala geumpa dan tsunami dari proses duek pakat Helsinki nyoe untok seumeuntara, mangat gleh mata dan pikeran teuh watee takalon buet nyan.

Meunyo mata dan pikeran teuh ka gleh, jinoe ka jeuet tapeugot saboh su-eue:

“Meunyo chit kon geuduek pakat sabab bala tsunami, peue chit alasan geuh geuduek sapat ngon musoh bansa? Padahai Wali Nanggroe, Tgk. Hasan, sabe neupeugah han jeuet tameurundeng ngon Indonesia sabab sabe geutanyoe akan dipeungeuet?”

Nyan keuh peureulee that-that takalon kondisi ‘peumimpen’ geutanyoe yoh masa sigohlom geujak u Helsinki nyan.

Malik Mahmud dan Zaini Abdullah didrop le Polisi Nanggroe Swedia

Saboh peukara nyang that meunarek nyang lon baca bak internet ban-ban nyoe nakeuh haba teuntang Malik Mahmud nyang ka geupeugah bahwa droe geuh dan Zaini Abdullah na tom dipeutamong lam peunjara muyup tanoh disideh di nanggroe Swedia.

Bak Atjehpost.com meutuleh:

Wali (Malik) mengisahkan, ketika itu Pemerintah Indonesia menuduhnya dan Gerakan Aceh Merdeka sebagai teroris. Karena itu, Malik Mahmud dan Zaini sempat ditahan polisi Swedia dalam tahanan di bawah tanah.”

“‘Wali (Malik)’ geupeugah, bak watee nyan Peumeurintah Indonesia ka dipeugah droegeuh dan Geurakan Acheh Mardehka sibagoe teroris. Sabab nyan keuh, Malik Mahmud dan Zaini na tom didrop le polisi nanggroe Swedia dipeutamong lam peunjara muyup tanoh.”

Peukara nyan na tom lon baca chit lam buku Verandah of Violence (Seuramoe Keukeurasan) nyang geu-editor le Dr. Anthony Reid dari Singapore, dan bak media beurita lam basa Inggreh di internet. Oleh seubab nyan ulon tuwan keumeueng peugot saboh analisa teuntang peukara nyoe.

UNPO (Unrepresented Nations and Peoples Organization), organisasi keu bansa-bansa nyang hana roh lam PBB atawa gohlom mardehka, geulhat beurita bak website jih bak uroe buleuen 15 Juni 2004, nyang jicok dari kanto beurita Reuters:

“Sweden Arrests Exiled Leaders of the Free Acheh Movement (GAM)”

“Awak Swedia ka geudrop peumimpen-peumimpen GAM di peungasengan”

“Today, the 15th of June (2004), action has been taken against three persons suspected of grave breaches of international law,” said Sweden’s international prosecutors’ office.

“Uroe nyoe, uroe buleuen 15 Juni (2004), kalheueh meupeujak buet ateuh lhee droe ureueng nyan deungon sangkaan peulanggaran beurat hukom International,” geukheun le Jaksa Peununtot International Swedia.

Dum sumber-sumber laen nyang peuteubiet beurita saban lagee nyan teuntang peukara peumimpen GAM nyang ka didrop nyang jeuet tamita bak media online.

Teuma, peue nyang jeuet takalon dari peukara nyoe?

Nyang keu phon nakeuh, ‘peumimpen’ geutanyoe yoh masa nyan (Juni 2004), nyakni sigohlom tsunami teuka, teungoh lam keuadaan meuseupet dan teungoh meupeukara deungon hukom international di nanggroe Swedia.

Beuthat pih meunyo takira-kira peunjara nanggroe Swedia nyan pasti leubeh manosiawi meunyo tabandeng deungon peunjara Indonesia dan ureueng-ureueng nyang jaga peunjara disideh leubeh manosia nibak ‘binatang-binatang’ nyang jaga peunjara Indonesia, tapi masa nyan nakeuh masa nyang sosah that-that keu ‘peumimpen-peumimpen’ geutanyoe nyan, nyang ka leumak ngon udep seunang di nanggroe gop beuthat pih geutanyoe payah udep meulangoe lam darah di nanggroe droe teuh.

Malik Mahmud dan Zaini Abdullah, beuthat pih ureueng nyoe dua nakeuh ‘peutinggi-peutinggi’ GAM, tapi ureueng nyoe dua han tom geurasa udep sosah sabab Malik Mahmud chit han tom udep di Acheh, seudangkan Zaini ka awai geuplueng u luwa nanggroe jak peuseulamat droe geuh dan keuluarga. Han tom teujalok lam pikeran ureueng nyan dua untok geumeusosah sosah demi peurjuangan Acheh Mardehka.

Nyang keudua, peureulee tateupeue bahwa bak masa nyan Tgk. Hasan hana dipeutamong lam peunjara deungon alasan droeneuh nyan teungoh saket. Teuma peureulee tateupeue chit bahwa proses hukom bak nanggroe Swedia, lagee bak nanggroe-nanggroe laen di Irupa, hana saban lagee di Indonesia nyang jeuet tasogok dan pura-pura saket. Jadi dalam peukara nyoe, lon rasa jeuet tacok keusimpulan bahwa yoh masa nyan Wali Nanggroe bit-bit teungoh saket seuhingga droeneuh nyan hana keumah diba bak hukom. Teuma meunyo droeneuh nyan hana keumah diba bak hukom, beurarti droeneuh nyan chit ka han keumah geupeubuet-buet atawa han keumah geumat komando peurjuangan le. Teuma soe nyang mat komando peurjuangan ka?

Sangkaan Teroris dan Peulanggaran HAM

Meunyo takalon leubeh lhok lom, geutanyoe peureulee tateupeue chit peue alasan ureueng nyan didrop. Meunurot Malik, lagee nyang geupeugah bak the Atjeh Post, awak Indonesia ka dipeugot sangkaan ateuh gopnyan dan GAM sibagoe teroris. Teuma peue keuh beutoi nyan alasan jih? Dimuyup nyoe nakeuh analisa ulon tuwan.

Meunurot tulehsan nyang na bak website UNPO dan bak media-media online laen, lagee nyang ka teupot diateuh, ‘peumimpen’ GAM didrop sabab sangkaan peulanggaran beurat hukom international, tapi hana dipegah peue peulanggaran nyang teumeukeusud nyan.

Teuma, dalam buku Verandah of Violence: the Background to the Aceh Problem nyang geu-editor le Anthony Reid, Kirsten E. Schulze geupeujeulaih bahwa peulanggaran beurat ateuh hukom international nyang teumeukeusud nakeuh:

“… Senen Atrium, Jakarta Stock Exchange, and Cijantung mall bombings as well as the killings of Teungku Nazaruddin Daud and Professor Dayan Daud, the kidnapping of 243 civilians, along with burning of at least six schools.”

“… bhom di Atrium Senen, Bursa Saham Jakarta, dan Mall Cijantung, seureuta buet seumeupoh ateuh Tgk. Nazaruddin Daud dan Professor Dayan Daud, seumeudrop ateuh 243 rakyat sipil, meunan chit seumeutet ateuh paleng kureueng 6 boh sikula.”

Dari sangkaan-sangkaan nyan, geutanyoe jeuet takalon bahwa Indonesia chit saja dipeugot useuha untok diboh cap teroris keu GAM (peurjuangan geutanyoe nyoe) ateuh buet seumeubhom.

Sangkaan laen nakeuh buet seumeupoh, seumeudrop, dan seumeutet. Peukara nyoe keuh nyang sebeutoi jih that meupaloe keu Malik Mahmud. Beuthat pih geutanyoe hana that tapeureumeuen peukara nyoe, tapi buet nyan ka jeuet dipeutamong lam peukara peulanggaran rayek hak asasi manosia. Leubeh meupaloe lom, peumeurhati konflik Acheh dari donya international yakin bahwa Malik na roh dalam buet nyan. Meunyo chit meuteumeueng diba bak Mahkamah di Swedia dan teubukti salah, maka tamat keuh riwayat Malik.

Teuma pakon Malik Mahmud bak the Atjeh Post geupeugah bahwa droegeuh didrop sabab sangkaan teroris mantong? Dan dalam media beurita online Indonesia pih sabe dipeugah meunan? Alasan jih nakeuh sabab mandua blah pihak na keupeuntengan untok peusom buet peulanggaran HAM nyan. Beuthat pih Malik roh dalam buet peulanggaran HAM, pihak Indonesia pih leubeh le lom dipeubuet buet nyan. Di sinoe mantong ka deuh takalon “dame” keuphon antara keudua blah pihak untok “peuseungap” peukara HAM. Jadi hana peue hireuen teuh meunyo watee di Helsinki pihak “GAM” geu-iem droe geuh lam peukara nyan dan pihak Indonesia teusinyom-sinyom mantong.

Teuma, geugeuteubiet keuh isu teroris bunoe mangat geutanyoe tuwoe keu peulanggaran HAM dan mangat Indonesia meuteumeueng sokongan donya International untok peu-anco GAM, sabab bak masa nyan donya barat chit teungoh teuga-teuga that dipeuprang teroris.

Maken Meuseupet

Malik Mahmud dan Zaini Abdullah ditheun lam peunjara Swedia lam 3 uroe sagai dan lheueh nyan dipeulheueh deungon alasan han sep bukti. 3 uroe lam peunjara, meunyo tabandeng deungon geutanyoe nyang na meuthon-thon ka lam peunjara Indonesia, sebetoi jih kon keuh saboh peukara nyang rayek lam saboh peurjuangan peumardehka Nanggroe. Tapi bak geupeugah calitra bak the Atjeh Post, weuh ate teuh chit:

Doto Zaini bernasib baik, karena di kamar tahanan dapat ranjang tidur, sedangkan saya tidur dilantai,”

 “Doto Zaini got chit untong, sabab lam bilek tahanan geuh na teumpat eh, seudangkan lon payah eh di ateuh aleue.”

Beuthat pih ka dipeulheueh, tapi peukara hukom nyan hana dipiyoh ot nan mantong, sabab meunurot Kirsten E. Schulze,

“…, in August 2004, following the confiscation of documents, a laptop, seven cellular phones, and $10,000 cash as well as pictures and video cassettes of GAM military training from the residence of Tiro, Mahmud, and Abdullah, the head of the Swedish Prosecutor’s Office announced that Mahmud and Abdullah would stand trial in December.”

“…, bak buleuen Agustus 2004, lheueh dicok paksa dokumen-dokumen, saboh laptop, tujoh boh talipon jaroe, dan peng $10,000 seureuta gamba-gamba dan kaset-kaset video latihan milite GAM dari rumoh Tiro, Mahmud, dan Abdullah, ketuha kanto Keujaksaan Swedia ka geupeugot peungumuman bahwa Mahmud dan Abdullah akan disidang bak buleuen Desember.”

Meunyo takalon bit-bit Malik dan Zaini karap tamat riwayat di sideh di Swedia. Soe neuk bela awak nyan lam peukara teroris dan peulanggaran HAM?

Teuma peue keuh hana meupeue seubab ureueng nyan geuteurimong laju tawaran meuduek pakat di Helsinki? Teuma peue keuh betoi Wali na roh dalam peugot peunutoh untok meuduek pakat nyan (seudangkan peurangkat hukom Swedia ka dipeupasti bahwa droeneuh nyan teungoh saket brat)? Teuma peue keuh hana meupeue seubab sidang nyan hana jadeh dipeugot watee Malik ka geutem jak duek pakat?

Neuchi pike keudroe dan neudiskusi sare keudroe-droe, deungon syarat bek neumeupake. Mandum niet geutanyoe Insya Allah got keu bansa dan neugara nyang that tacinta, jadi jak tapeuteupat peukara nyoe mangat glah dan jeuet geutanyoe meusaboh lom lagee nyang ka-ka.

Catatan: Na tom lon tanyong bak sidroe peuneuliti peukara Acheh dari luwa, pakon sidang nyan hana jadeh dipeugot? Geuseu’ot le gopnyan, sabab GAM ka ditem duek pakat di Helsinki dan Indonesia ka dilakee peutheun sidang nyan bak awak Swedia. (Nan peuneuliti nyan han jeuet lon peugah sabab hana izin dari droegeuh)

Darussalam, 16 Agustus 2012

Mundzir bin Muntasir

Peusan Perjuangan

May 4, 2012

Keu Bansa Acheh nyang mantong geumeuseutia keu perjuangan Acheh Merdeka:

Uroe nyoe, meubagoe cap ka diboh keu geutanyoe le ureueng droeteuh nyang ka na dimuyup koasa musoh. Meubagoe fitnah dan propaganda hana piyoh-piyoh dipeutroh untok dipeugadoh perjuangan mulia bansa Acheh.

Beuthat pih meunan, teumeulakee bak geutanyoe mandum – bek tasurot le meusijeungka. Beutatem dong meuglong lagee teupula.

Beutatem teumuleh haba nyang beuna, seujarah nyang beuna, bak beurangkapeue media – sabab dumpeue nyang tatuleh nyan akan teukeubah trok ‘an dudoe. Beuthat pih ureueng droe teuh keudroe jinoe hana dipeureumeuen atawa hana dipateh peue nyang tatuleh nyan, bek sagai-sagai geutanyoe weuh dan beungeh. Sabab ukeue, InsyaAllah, ureueng geutanyoe akan leubeh carong nibak ureueng geutanyoe jinoe – dan bak masa nyan keuh akan geumita keulai kebenaran. Meunyo geutanyoe han tatem teumuleh dan han tatem keubah seujarah droeteuh nyang beuna lagee na, maka generasi ukeue pih akan sesat dan perjuangan han akan meusambong.

Saleuem Perjuangan Acheh Merdeka,

Mundzir bin Muntasir

Amanah Nyang Dipeuna

March 19, 2012

Tulesan go nyoe nakeuh tanggapan ulon tuwan ateuh teunuleh nibak Tgk. Omar Puteh bak online group – IASCF. Geutuleh le droeneuh nyan:

“Motto: Perjanjian Persepahaman Damai: MoU Helsinki, Findlandia, 15 Agustus, 2005 adalah sebagai tanggung jawab warisan,  bagi masyarakat Achèh, khususnya  di Achèh dan seluruh dunia pada umumnya!”

Narit nyoe, kayem that tadeungo lheueh diteken MoU Helsinki. Narit nyoe bak hi tadeungo ka jeuet keu peumaksaan – intimidation – keu ureueng geutanyoe, masyarakat Acheh, untok tajaga konflik seunjata nyang ka dipeupiyoh nyang ka tarasa jinoe. Peumaksaan nyoe hana patot dipeudong ateuh bansa Acheh, sebab tiep-tiep bansa na hak untok dipeuteuntee nasib droe jih nyang hana sesoai deungon buet peumaksaan nyang teumeukeusud diateuh.

Dimuyup nyoe nakeuh beunalah nyang lon kirem bak Online Group IASCF, beujeuet keu bahan pikeran geutanyoe masen-masen. Komen nyang jroh dan beunalah deungon budi bahsa nyang got dari ureueng droeneuh mandum that ulon tuwan peuyum.

Tgk. Omar Puteh, NEUBACA!!!

Pane neuteumeung motto nyang neutuleh nyan? Tulong neupeujeulaih beutrang bek sampoe motto nyoe jeuet keu narit nyang hana mupat asai dan dudoe jeuet keu narit untok peupicah-blah bansa Acheh.

 
Pakon bak motto-nyan meuteuntee that meutuleh MoU sibagoe tanggong-jaweueb masyarakat Acheh? Peue keuh masyarakat Acheh sidroe nyang teumeuceukot dalam MoU nyan – peue keuh masyarakat Acheh nyang teken MoU nyan?

Tgk. Omar Puteh nyang neupeucarong-carong droe,

 
“Keterwakilan” masyarakat Acheh dalam duek pakat di Helsinki nyan – deungon hase MoU – pih, mantong jeuet tapeugot keu saboh peukara. Peue lom meunyo na sidroe-droe ureueng nyang keuneuk peuteuntee tanggong-jaweueb untok peudong dan peujak MoU nyan bak jaroe masyarakat Acheh.
 
Neukalon keulai le droeneuh nyang budiman,
1. Na dua blah pihak nyang meukonflik nyang teumeuceukot dalam MoU nyan,

“The Government of Indonesia (GoI) and the Free Aceh Movement (GAM) confirm their commitment…” (Preamble MoU Helsinki).

Seucara jeulaih meutuleh disinoe, mandua blah pihak – nakeuh GoI dan GAM – dipeunyata  komitmen jih. 

Nakeuh narit “BULLSHIT” – ek leumo, meunyo neukheun MoU nyan sibagoe tanggong-jaweueb masyarakat Acheh, meunyo pihak-pihak nyang peunyata komitmen keudroe hana dipeudeuh tanggong-jaweueb droe jih meu-ube seuma ateuh sipeue-peue nyang ka dipeunyata dalam MoU nyan!!!

 
2. Credibility pihak nyang teken untok peudong asoe MoU,

Peukara credibility – sifeut jeuet teupeucaya dari ureueng nyang teken MoU nakeuh peukara nyang paleng peunteng dalam sinambong buet MoU. Sifeut nyoe keuh nyang jeuet keu-jaminan bagi masyarakat bahwa mandua blah pihak akan dipeudong buet lagee nyang ka dimeujanji.
 
That sayang teuh hai, Tgk. Omar Puteh. Sipai nyan, nyang utama, kon keuh saboh Nanggroe atawa saboh pemerintahan nyang na sifeut jeuet teupeucaya. Meu-ulang go ka geutanyoe, bansa Acheh, dipeungeut le Nanggroe sinambong buet Penjajah Beulanda nyan. Peukara nyoe hana pat bantah, kecuali bagi ureueng-ureueng nyang bangai.
 
Teuma ulon tuwan rasa kiban got pih GAM – bek payah tameupake peukara peue keuh petinggi GAM nyan jeuet tapeucaya atawa han – meunyo saboh pihak mantong, nakeuh sipai, han jeuet tapeucaya, ka teuntee MoU nyan han jeuet tapeugot sibagoe teumpat tamumat nyawong bansa Acheh.
 
Meunan keuh, “NONSENSE”- haba soh – meunyo tapeugot peurintah keu masyarakat Acheh untok geutanggong-jaweueb buet peudong MoU, seumentara tateupeue paleng kureueng na saboh pihak meukaet nyang han jeuet tapeucaya!!! 
 
2. Status hukom MoU,
 
Memorandum of Understanding, narit nyoe chit that hayeue bak tadeungo le geutanyoe ureueng gampong nyang hana tateupeue sapeue peukara hukom – peue keuh hukom pa’i, peue lom hukom internasional. Bahkan nibak ladom ureueng geutanyoe, lagee droeneuh Tgk. Omar Puteh, MoU nyoe ka jeuet tapeugot sibagoe hukom paleng lambong teumpat ta-ikat taloe perjuangan Nanggroe geutanyoe, Acheh Merdehka.

Sep that sayang teuh, Tgk. Omar Puteh, Memorandum of Understanding nyan kon keuh sipeue-peue nyang hayeue meunyo tameuceukot dalam hukom internasional. MoU Helsinki kon keuh sipeue-peue nyang meu-ikat seucara hukom, kon keuh sipeue-peue nyang jeuet taba bak Mahkamah sibagoe bukti untok tahukom saboh-saboh pihak. Seudang kan geutanyoe chit ka tateupeue, lagee nyang ka teupeujeulaih diateuh nyoe, bahwa paleng kureueng na saboh pihak meukaet dalam MoU Helsinki nyoe nyang han jeuet tapeucaya. Ditamah lom, MoU nyan keudroe hana ikatan hukom sapeue. Peue keuh ek ditamong lam utak droeneuh, Tgk. Omar Puteh, untok neubi tanggong jaweueb bak masyarakat Acheh untok peudong dan peujak perjanjian nyang lagee nyan rupa?

 
MoU Helsinki kon keuh saboh perjanjian internasional nyang diangkee le U.N. Seudang kan meunurot hukom sipai keudroe, mantong le peukara-peukara nyang hana jeulaih teuntang sifeut-sifeut perjanjian nyang diangkee sibagoe perjanjian internasional dan nyang hana.

MoU seucara umum, nakeuh beuntok formal dari ‘gentlemen words’ – narit ureueng agam. Ceunto paleng sederhana jih:
Si Pulan: “Hai Pulen, jak tajak meulaot ngon lon uroe nyoe. Sikhan nibak laba tabagi dua.”
Si Pulen: “Jeuet Pulan, hai. Jak teuk tajak jinoe.”

Si Pulan dan Si Pulen mandua ka saboh pakat untok jijak meulaot dan laba dari meulaot akan dibagi dua. Keuseupakatan ureueng nyoe dua takheun, ‘gentlemen words’ – narit ureueng agam. Si Pulen yakin Si Pulan akan dipeudong narit nyang dimeujanji, meunan chit Si Pulan yakin Si Pulen akan dipeudong narit nyang dimeujanji.

 
Teuma dudoe, na laba 100 ribee. Si Pulan jibi 10 ribee keu Si Pulen kon lagee dimeujanji awai. Peue keuh Si Pulen jeuet jak bak polisi atawa Mahkamah lakee peng 40 ribee treuk? Han jeuet, sabab gentlement word – narit ureueng agam – nyan hana meu-ikat seucara hukom, meulaenkan seucara moral dan agama. Si Pulan nakeuh ureueng nyang hana moral dan akan diteurimong beunalah dari Poteuh Allah Ta’ala.

Maka, Tgk. Omar Puteh nyang teungoh neuduek-duek mangat di Eropa, nakeuh peukara nyang ‘IRRATIONAL’ – han ditamong lam akai, meunyo tapeuwareh MoU, nyang hana keukuatan hukom sapeue, keu aneuk-cuco bansa Acheh untuk dipeudong Nanggroe Acheh nyoe!!!

 
Keusimpulan ulon tuwan:

Keu phon, han mungken Almarhum Wali Nanggroe Hasan DiTiro, nyang carong dalam hukom dan politek internasional, Neubi amanah dan Neubi tanggong-jaweueb keu masyarakat Acheh untok peudong MoU Helsinki nyang hana ikatan hukom sapeue nyang jeuet keu senjata bansa Acheh meunyo na saboh-saboh pihak nyang akan seumeungeut, seumulet, ataupun khianat keu bansa Acheh. 

Keu duwa, ureueng sekaliber Droeneuh nyan, nyang geutu’oh cara peubedoh keulai Ideology Acheh Merdeka meunurot hukom international deungon landasan hak tiep-tiep bansa untok peuteuntee naseb keudroe – self determination, han akan mungken geupeugadoh hak nyan deungon geupaksa masyarakat Acheh untok geuteurimong MoU Helsinki, peue lom untok geupaksa masyarakat Acheh untok tundok dalam saboh partai lokal, PA.

Dan nyang kheu lhee, ka teuntee na saboh golongan ureueng Acheh nyang dipeucarong-carong droe jih dan ka dingui nan Almarhurm Wali Nanggroe Hasan DiTiro untok keupeuntingan golongan dan keluarga droe jih. Beuthat pih dipeungui nan Almarhum Wali, tapi buet golongan nyoe kon tandengan nibak buet Almarhum Yang Mulia – peue keuh rhot sagoe politek, teumuleh, informasi, dan ilmee. 
Buet dari golongan nyoe, han tom diangkee dan dipeudong cara duek-pakat sare bansa Acheh – sabab golongan nyoe han sep ilmee untok diduek dalam saboh-saboh diskusi.  Meunan keuh lahe buet peucat seumeucat, kop seumeukop, bahkan buet poh seumeupoh, sare bansa Acheh keudroe-droe. Buet-buet nyoe dipeuphon dari bansa Acheh nyang na diluwa Nanggroe, Eropa dan Malaysia, dan watee lheueh MoU ka troh buet nyoe u Acheh.

Peusan ulon tuwan keu bansa Acheh: kon tanggong-jaweueb geutanyoe untok tapeudong dan teupeujak MoU Helsinki nyan, meulaenkan hak geutanyoe untok tateurimong poin-poin MoU nyan teupeudong dan teupeujak lagee nyang ka dimeujanji dan hak geutanyoe chit untok tatulak MoU nyan meunyo mandua blah pihak hana diniet na hak-hak ureueng Acheh. Hak bansa Acheh keuh untok peuteuntee naseb bansa Acheh ukeue. Beurangkasoe ureueng atawa golongan dan beurangkapeue daleh nyang dingui untok jak paksa dame MoU sibagoe tujuan akhe nibak perjuangan bansa Acheh, maka ureueng nyan ka dilanggar hak bansa Acheh untok peuteuntee naseb droe – self determination.


 
Mundzir bin Muntasir.

 

Peue keuh jeuet Gubernur Aceh lakee Merdeka?

March 15, 2012

Kuta Raja – Sidroe rakan geutanyoe na geupeuteubiet su-eue nyang geusipreuk rhot akun facebook “Atjeh Meurdehka”:
“Apabila gubernur Aceh sendiri yang memaksa hindunisia untuk memerdekakan Aceh. berapa besar kemungkinan Aceh akan merdeka??”

Meunurot ulon tuwan:
Peukara nyoe payah takalon beugot-got bek sampoe geutanyoe tameuharap bak haba soh. Peureulee that tateupeue kemampuan sidroe-droe ureueng dan hak seureuta koasa nyang na nibak saboh-saboh jabatan. Bek geutanyoe tameulumpoe keuneuk tapo u beuleuen meunyo kapai nyang tangui nakeuh pesawat smec, ka teuntee han akan meuhase.

Meunyo Gubernur nyang memaksa atawa meulakee atawa membujuk Indon untuk memerdekakan Aceh, berarti gubernur nyan ka dilanggar sumpah jabatan jih – menjaga keutuhan NKRI. Maka Indon jeuet dimita langkah hukom ateuh gubernur nyan – meunyo kon jipeugadoh lagee buet nyang ka-ka.

Peumerdeka Nanggroe nyan kon buet sidroe-droe ureueng, meulaenkan buet man saboh bansa. Saboh bansa nyan han jeuet tapeu-ubeut jeuet keu saboh partai atawa saboh province. Meunyo ka tapeu-ubeuet, maka han akan sep teunaga untok tapeubeudoh saboh Nanggroe.

Dalam konteks Gubernur, meunyo jih chit ureueng Aceh nyang amanah – buet paleng teuga nyang jeuet dipeubuet keu perjuangan Aceh nakeuh, dijaga Nanggroe bek karu, dipeutheun teuntra indon bek digisa le u Aceh, dipeulambong agama dan pendidekan seureuta dijaga identitas ureueng Aceh bek sampoe gadoh. Beujeuet keu Gubernur nyang Amanah keu perjuangan bansa!

Meunan keuh tanggapan dari ulon tuwan, saleum.

Mundzir.

Haba Keuphon

March 14, 2012

Kuta raja – Malam nyoe, ulon tuwan ka lon peugot saboh peunutoh bahwa ulon tuwan akan lon peugot saboh blog untok lon keubah mandum tulesan-tulesan lon teuntang Aceh. Tulesan-tulesan nyan ntreuk hana mesti meubentok artikel nyang leungkap, tapi jeuet chit dalam beuntok komen singkat ateuh saboh-saboh peukara nyang lon rasa peunteng dan patot diteupeue le ureueng rame.

Meunan keuh, blog nyoe – habameutuleh.wordpress.com, ulon tuwan peugot. Pikeran dan sokongan nyang got dari ureueng droeneuh mandum that ulon tuwan peuyum.

Saleum,

Mundzir